Pa asnjë njoftim zyrtar apo lajmërim indirect, doganierët e Durrësit janë befasuar teksa kanë parë në zyrë kryeministrin Rama. Në këtë pikë doganore Kryeministri ka inspektuar punën që bëhet në një ditë në doganë, por edhe ka parë nga afër mjediset e punës, ndërsa ka postuar në “Twitter” një fotografi të ambienteve të doganës ku shkruan: “A ju besohet se kjo është Dogana e Durrësit? Po, në këto dy kioska shërbehen importuesit shqiptarë e të huaj!”
“Një godinë e rrënuar komuniste për administratën, dy kioska dhe një peshore e vetme për mijëra kontenierë, doganë e botës së tretë!”- shkruan Rama në “Twitter”.
Sipas kryeministrit, “kjo gjendje turpëruese për shtetin dhe torturuese për biznesin duhet dhe do të marrë fund me projektin tone të ri për Doganën e Durrësit!”
Një ditë më parë, i shoqëruar nga Drejtoresha e Doganave, Elisa Spiropali, Rama ka zgjedhur për inspektim doganën e Hanit të Hotit. Në përfundim të vizitës, Drejtoresha e Doganave, Elisa Spiropali bëri të ditur se kryeministri mori angazhimin për të mbështetur administratën doganore në ndërtimin e një infrastrukture të re në pikat kufitare.
